|
Anxo Sánchez é
arquitecto, e non só remata aí o que hai que decir del xa que é unha
persoa con moitas outras capacidades e sensibilidades, como o
xornalismo ou a fotografía. Ademais ten unha boa relación coa rede
que o leva a recomendar unha larga lista de páxinas para visitar. |
Definir o que
fai Anxo Sánchez (Lugo, 1973) é como querer poñer coto ó infinito.
Porque o que fai Anxo é abranguer diferentes artes, disciplinas e facer
delas unha forma de vida. Estudiou Arquitectura na Coruña, e sen embargo
o seu devir profesional non sempre vai neste camiño, en parte pola
propia dinámica da profesión. Entre os encargos que lle van xurdindo,
compaxina ós traballos como infografista para outros arquitectos, co de
bibliotecario na delegación de Lugo do Colexio Oficial de arquitectos de
Galicia, onde elabora propostas de intervención urban de acordo ó
convenio entre o Colexio e o Concello de Lugo, e tamén leva adiante o
seu traballo controlando obras para a "Entidad para el control de la
Calidad en la Construcción Galicia-Asturias".
Pero como traballador todoterreo que é e persoa con inquedanzas tamén
ten feito certos escarceos co xornalismo, formou parte da equipa de
Xanela da Cultura, e como articulista de opinión sobre a arquitectura
colaborou desde o primeiro número no suplemento "Descubrir" de O Correo
Galego, e é membro fundador da revista "Apátrida Arquitectura". A todo
iso hai que engadir a súa afección á fotografía artística.
Entre os seus últimos traballos rematados está o anteproxecto dunha
rehabilitación da casa preto de Begonte, unhas propostas no marco dun
convenio entre o COAG e o concello de Lugo. Eso si, segue agardando ter
"oportunidades como arquitecto para facer ARQUITECTURA, así, con
maiúsculas".
E a informática é unha parte do seu traballo, en parte polos consabidos
programas que emprega no seu quefacer diario (autocad, 3D-Studio,
Presto, CypeCAD), pero non remata só aquí, en parte polos seus propios
intereses. O deseño de webs é outra das súas afeccións, ás que
deberíamos engadir o cine, na que pertence ó colectivo Fonmiñá que é o
organizador da Semana de Cine de Autor de Lugo e foi co-organizador da I
Xornada de Cine Apátrida Arquitectura durante a súa época de estudiante
na Coruña. Con web propia que lle ten facilitados certos traballos,
emprega a rede desde hai máis de sete anos, como unha ferramenta
imprescindible no día a día, "na procura de información especializada,
arquivos, normativa ou simplemente entretemento". E non só iso senón que
atende "as comunicacións por correo electrónico ou entro no IRC-Hispano
a conversar con xente (usualmente na canle #Galiza e nalgunhas nas que
falan de cine)". |